APPLE-მა ახალი ოპერაციული სისტემები წარადგინა

06/09/2021

კომპანია Apple-მა დეველოპერთა ყოველწლიურ მსოფლიო კონფერენციაზე მომხმარებლებს ახალი ოპერაციული სისტემები წარუდგინა. მათ შორისაა iOS 15iPadOS 15watch OS 8 და macOS Monterey, რომელთა ბეტა ვერსია ელექტრონული მოწყობილობების მფლობელთათვის მიმდინარე წლის ივლისში გახდება ხელმისაწვდომი, შემოდგომაზე კი განახლებებით ფართო საზოგადოებაც ისარგებლებს.

iPhone-ისთვის შექმნილი iOS 15 სხვადასხვა მნიშვნელოვან სისტემურ ცვლილებას აერთიანებს. FaceTime-ით ზარების განხორციელებისას მომხმარებლები ამიერიდან სივრცული აუდიოს ფუნქციით ისარგებლებენ, რომლის მეშვეობითაც სმარტფონში შემომავალი ხმა ისე გაჟღერდება, თითქოს მოსაუბრე ადამიანი ჩვენს სიახლოვეს იმყოფება. შესაძლებელი გახდება ფონური ხმაურის ჩახშობა და უკანა ხედის დაბურვა, მეგობრებისთვის სპეციალური ბმულების გაზიარება, რომლითაც ისინი საუბარში ჩაერთვებიან და მათთან ერთად მუსიკის მოსმენა, ვიდეოს ყურება ან აპლიკაციების გაკონტროლება. iPhone-ის ეკრანზე რამდენიმე რეჟიმს ვიხილავთ, რომლებსაც მუშაობის ან დასვენების დროს გავააქტიურებთ. პირველ შემთხვევაში, სმარტფონში მხოლოდ სამსახურისთვის საჭირო აპლიკაციები გამოჩნდება, მეორე ვარიანტის არჩევისას კი პირიქით


 iPhone-ის მფლობელები მალე სხვადასხვა სისტემური განახლებით ისარგებლებენ, ფოტო: Apple


განახლებები ნაკლებად მნიშვნელოვანი შეტყობინებების თავმოყრის და მითითებულ საათებში მათი ერთდროულად მიღების საშუალებასაც იძლევა. კამერას უკვე სურათებზე არსებული ტექსტების ამოკითხვა შეეძლება, შესაბამისად, მათი მონიშვნა, ასლის გაკეთება და საძიებო სისტემაში ჩასმა პრობლემა არ იქნება. ის ასოების მიღმა გამოსახულ ობიექტებსაც აღიქვამს, მაგალითად, ფოტოზე აღბეჭდილი ძაღლის ჯიშს, გეოგრაფიულ თუ სხვა სახის ორიენტირებს და სხვა. აპლიკაციაში Apple Wallet დაემატება სახლის, ოფისისა და სასტუმროს ციფრული გასაღებები. ასევე, პირადობისა თუ მართვის მოწმობის დაშიფრული ასლები, რომლებიც სტანდარტულ შემოწმებას ჩვეულებრივ გაივლიან. გაუმჯობესდება Apple Maps, რომელიც უფრო დეტალურ, სამგანზომილებიან რუკებს გააერთიანებს და ახლომდებარე შენობის სკანირების გზით სწორ მიმართულებას მოგვცემს.

Apple-ის პლანშეტური კომპიუტერებისთვის შექმნილი ახალი ოპერაციული სისტემა iPadOS 15. ფოტო: Apple


Apple-ის პლანშეტური კომპიუტერების სერია iPadOS 15-ის წყალობით ინოვაციურ მახასიათებლებს შეიძენს. მათ შორისაა iPad-ის დესკტოპზე თავმოყრილი შედარებით დიდი ზომის ვიჯეტები, მთავარ ეკრანზე კატეგორიების მიხედვით დაჯგუფებული აპლიკაციების ჩამონათვალი App Library და მრავალფუნქციური მენიუ Split View, რომლის მეშვეობითაც რამდენიმე ფანჯარას ერთდროულად გავხსნით და გამოვიყენებთ. აპლიკაციაში Notes გაკეთებულ საზიარო ჩანაწერებში სიმბოლოთი @ მალე მეგობრებს მოვნიშნავთ და იქ შეტანილ ცვლილებებს თვალსაჩინოს გავხდით. Quick Notes-ით კი თითის მარტივი მოძრაობით ახალ დოკუმენტს შევქმნით. მთელ სისტემაზე გავრცელდება თარგმნის ფუნქცია, რომელიც მოსაუბრის მიერ ნათქვამ წინადადებებს პირდაპირ რეჟიმში სასურველ ენაზე გადაიყვანს.


Apple-ის კომპიუტერებისთვის შექმნილი macOS Monterey. ფოტო: Apple

Apple-ის კომპიუტერების მფლობელებს macOS Monterey ასევე სთავაზობს მეგობრებთან ერთად სინქრონულად მუსიკის მოსმენასა და ვიდეოების ყურებას. Universal Control-ის საშუალებით სხვადასხვა ურთიერთთავსებად მოწყობილობას ერთი კლავიატურით ან მაუსით გავაკონტროლებთ, რისთვისაც მხოლოდ ამ უკანასკნელთა გვერდიგვერდ დადებაა საჭირო. სისტემა მათ ავტომატურად ამოიცნობს. Macbook-ებს ემატება აპლიკაცია Shortcuts და უსადენო სტრიმინგის ტექნოლოგია AirPlay, რომლითაც კონტენტს ეკრანზე მარტივად გადავიტანთ. ვებ ბრაუზერი Safari გაუმჯობესებული ინტერფეისით აღიჭურვება, ფანჯრების ზომა კი შემცირდება და მათი დაჯგუფება გახდება შესაძლებელი.

Apple-ის საათებისთვის შექმნილი watchOS 8. ფოტო: Apple

Apple-ის საათებში არსებული აპი Health watchOS 8-ის დახმარებით დააკვირდება, წუთში რამდენჯერ ჩავისუნთქავთ ჰაერს. ის ინფორმაციას მოგვაწვდის, როგორ იცვლება ეს რაოდენობა დღე-ღამის განმავლობაში, მაგალითად, ძილის დროს. Fitness-ის აპლიკაციაში ახალი ვარჯიშებიც გამოჩნდება, როგორიცაა პილატესი და ტაიცზი. მოწყობილობების ეკრანზე მალე iPhone-ით პორტრეტის რეჟიმში გადაღებულ სურათებსაც დავაყენებთ, რომელთა მიღმა სურვილისამებრ კონკრეტულ ტექსტს გამოვსახავთ.

აღსანიშნავია, რომ სიახლეები ეხება ბლუთუზზე მომუშავე ყურსასმენებსაც AirPods, რომელთა გამოყენებისას ხმაურიან გარემოში ადამიანებთან პირდაპირი საუბრის დროს მათ ხმას ჟღერადობას ხელოვნურად მოვუმატებთ, რათა ნათქვამი უკეთ გავიგოთ. აპლიკაცია Find My app მაშინაც იფუნქციონირებს, თუ ყურსასმენები სათავსოში იდება, მათი დაკარგვის შემთხვევაში კი მომენტალურად გაგვაფრთხილებს. ამის გარდა, მომხმარებელთა უსაფრთხოება ახლა მეტად დაცული იქნება, რის შედეგადაც პროგრამებს ჩვენს პერსონალურ ინფორმაციაზე წვდომა შეეზღუდება. რაც შეეხება ვირტუალურ ასისტენტს Siri, მიმდინარე წლიდან ის გარეშე მწარმოებლების პროდუქტებშიც ჩაშენდება.

კომენტარები

კომენტარეები ვერ მოიძებნა

მიმიხილვის დაწერა