ჯეფ ბეზოსის კომპანიამ BLUE ORIGIN ეკიპაჟიანი ფრენის ნებართვა მიიღო

07/15/2021

მსოფლიოს უმდიდრესი ადამიანის, ჯეფ ბეზოსის კომპანიამ Blue Origin ამერიკის შეერთებული შტატების ავიაციის ფედერალური ადმინისტრაციისგან (FAA) პირველი სუბორბიტული ეკიპაჟიანი მისიის განხორციელების ნებართვა მიიღო. გავრცელებული ინფორმაციის თანახმად, ფრენა New Shepard-ის სახელით ცნობილი ხომალდით მიმდინარე წლის 20 ივლისს შესრულდება.

აღსანიშნავია, რომ Blue Origin-ის პირველ ეკიპაჟიან მისიაში მონაწილეობას კომპანიის დამფუძნებელი, ჯეფ ბეზოსი და მისი ძმა, მარკ ბეზოსი მიიღებენ. დედამიწის ატმოსფეროსა და კოსმოსის გამყოფ ე.წ. კარმანის ხაზამდე, რომელიც ჩვენი პლანეტიდან დაახლოებით 100 კილომეტრის დაშორებით მდებარეობს, New Shepard კიდევ ოთხ ადამიანს აიყვანს. კომპანიამ ხომალდის ბორტზე მოსახვედრი ერთი ბილეთი აუქციონზე გაყიდა. ანონიმმა მყიდველმა მასში 2,8 მილიონი აშშ დოლარი გადაიხადა. როგორც ცნობილია, აპარატს აშშ-ის ტექსასის შტატის დასავლეთ ნაწილში მდებარე Blue Origin-ის კუთვნილი კოსმოდრომიდან გაუშვებენ. ფრენა დაახლოებით 11 წუთს გასტანს.

ჯეფ ბეზოსის კომპანია New Shepard-ის შექმნაზე 2006 წლიდან მუშაობს. მას სახელი NASA-ს ასტრონავტის, ალან შეპარდის პატივსაცემად უწოდეს. ეს უკანასკნელი 1961 წელს პირველი ამერიკელი, ასევე, მსოფლიოში მეორე ადამიანი გახდა, რომელმაც კოსმოსში იმოგზაურა. New Shepard პირველად 2015 წელს გამოცადეს, რა დროსაც აპარატმა 93,5 კილომეტრის სიმაღლეზე ასვლა შეძლო. ხომალდმა დასავლეთ ტექსასში განლაგებული კერძო კოსმოდრომიდან დღემდე საერთო ჯამში 15 სატესტო ფრენა შეასრულა, მათ შორის ბოლო მისია 2021 წლის 14 აპრილს განხორციელდა.

Blue Origin-ის მთავარ კონკურენტად ბრიტანელი მილიარდერის, რიჩარდ ბრენსონის კომპანია Virgin Galactic მიიჩნევა. აღსანიშნავია, რომ ამ უკანასკნელმა სადებიუტო სრულეკიპაჟიანი ფრენა VSS Unity-ის სახელით ცნობილი კოსმოსური თვითმფრინავით მიმდინარე წლის 11 ივლისს შეასრულა. მისიაში მონაწილეობა კომპანიის დამფუძნებელმა, რიჩარდ ბრენსონმაც მიიღო, რითიც ჯეფ ბეზოსს რამდენიმე დღით დაასწრო და პირველი მილიარდერი გახდა, რომელმაც კოსმოსში იმოგზაურა.

კომენტარები

კომენტარეები ვერ მოიძებნა

მიმიხილვის დაწერა