ხომალდით CREW DRAGON კოსმოსში ოთხი ასტრონავტი გაფრინდა

04/25/2021

ამერიკელი ასტრონავტები - შეინ კიმბროუ და მეგან მაკარტური, იაპონელ აკიჰიკო ჰოშაიდთან და ფრანგ თომას პესკესთან ერთად კომპანია SpaceX-ის ხომალდით Crew Dragon საერთაშორისო კოსმოსურ სადგურზე გაფრინდნენ. ამერიკის შეერთებული შტატების აერონავტიკისა და კოსმოსის კვლევის ეროვნული სააგენტოს (NASA) მისიის Crew 2 ფარგლებში დედამიწის ორბიტაზე ისინი ექვს თვეს გაატარებენ.

სამხრეთაფრიკული წარმოშობის მილიარდერის, ილონ მასკის კომპანიის მიერ შექმნილი რაკეტა Falcon 9 აშშ-ის ფლორიდის შტატში მდებარე კანავერალის კონცხზე განლაგებული კენედის სახელობის კოსმოსური ცენტრიდან 23 აპრილს, თბილისის დროით 13:49 საათზე აფრინდა და Endeavour-ის სახელით ცნობილი კაფსულა ჩვენი პლანეტის ორბიტაზე გაიყვანა. გაშვებიდან დაახლოებით ცხრა წუთის შემდეგ აპარატის პირველი, მრავალჯერადი გამოყენების საფეხური დედამიწაზე დაბრუნდა და ატლანტის ოკეანეში განლაგებულ სპეციალურ პლატფორმაზე უსაფრთხოდ დაეშვა. გავრცელებული ინფორმაციის თანახმად, Crew Dragon საერთაშორისო კოსმოსურ სადგურს 24 აპრილს, თბილისის დროით 13:10 საათზე მიუერთდება.

თავდაპირველი გეგმის მიხედვით, მისია Crew 2 ერთი დღით ადრე, 22 აპრილს უნდა განხორციელებულიყო, თუმცა NASA-მ გაშვება 24 საათით გადადო. სააგენტოს წარმომადგენელთა განმარტებით, ფრენის გაუქმება უამინდობის გამო გადაწყდა. შეგახსენებთ, რომ Crew Dragon-ის პირველი ეკიპაჟიანი მისია, რომელშიც მონაწილეობა ამერიკელმა ასტრონავტებმა, რობერტ ბენკენმა და დაგლას ჰერლიმ მიიღეს, 2020 წლის 30 მაისს შედგა. მომდევნო დღეს კი კაფსულა საერთაშორისო კოსმოსურ სადგურს მიუერთდა. კოსმოსური ფრენების ისტორიაში ეს პირველი შემთხვევა იყო, როდესაც ჩვენი პლანეტის ორბიტაზე ადამიანების გაყვანა კომერციულმა ორგანიზაციამ უზრუნველყო. ბოლო ინფორმაციით, SpaceX-ის ხომალდის მომდევნო ეკიპაჟიანი ფრენა მიმდინარე წლის შემოდგომაზე იგეგმება.

Crew Dragon საერთაშორისო კოსმოსურ სადგურზე ასტრონავტების რუსული "სოიუზის" ტიპის ხომალდების გამოყენების გარეშე, გაცილებით ბიუჯეტურ ფასად გასაგზავნად შეიქმნა. თუ ბოლო დრომდე NASA ერთი ადამიანის ორბიტაზე გასაყვანად დაახლოებით 80 მილიონ დოლარს იხდიდა, SpaceX-ის ხომალდით კოსმოსში ფრენის ღირებულება 20 მილიონამდე დოლარია. Crew Dragon-ის მრავალჯერადი გამოყენებით კი, დროთა განმავლობაში ამ თანხის კიდევ უფრო შემცირებაა მოსალოდნელი.


კომენტარები

კომენტარეები ვერ მოიძებნა

მიმიხილვის დაწერა