ისტორიაში პირველად, მეცნიერებმა კვანტური ქსელი შექმნეს

04/21/2021

ნიდერლანდებში მდებარე დელფტის ტექნოლოგიურ უნივერსიტეტში მომუშავე მეცნიერებმა სამი პროცესორის ერთმანეთთან დაკავშირების გზით კვანტური ქსელი შექმნეს, რაც მთელი მსოფლიოს მასშტაბით პირველი მსგავსი პრეცედენტია. ამის შესახებ დეტალური ინფორმაცია გამოცემაში Science ახლახან გამოქვეყნებულ ნაშრომშია წარმოდგენილი.

მეცნიერები უკვე მრავალი წელია კვანტური ინტერნეტის შექმნას ცდილობენ, რომელიც მაღალგანვითარებულ კომპიუტერებს მონაცემების სწრაფად და უსაფრთხოდ გაცვლის საშუალებას მისცემს. ბოლო დეკადის განმავლობაში მათ ორი პროცესორის წარმატებით დაკავშირება არაერთხელ შეძლეს, თუმცა ეს კვანტური ქსელის მისაღებად საკმარისი არ არის. ახალი კვლევის ფარგლებში, სპეციალისტებმა მოწყობილობების რიცხვი სამამდე გაზარდეს, რომლებსაც პირობითად ელისი, ჩარლი და ბობი დაარქვეს. ექსპერიმენტის მსვლელობისას, ამ უკანასკნელმა ერთგვარი შუამავლის როლი შეასრულა და პირველი პროცესორიდან მიღებული სიგნალის მეორემდე გაგზავნა უზრუნველყო.


მეცნიერთა ეს მიღწევა კვანტური ნაწილაკების განსაკუთრებულ კავშირს ემყარება. ისინი ერთმანეთთან ისე არიან გადაჯაჭვული, რომ ამა თუ იმ მანძილით დაშორების მიუხედავად, სივრცით მდგომარეობასაც კი იზიარებენ, რაც შესაძლებლობას იძლევა, ინფორმაცია ერთი წერტილიდან მეორეში წამიერად გადაიგზავნოს. მსგავსი ინტერნეტის დაჰაკვა ფაქტობრივად გამორიცხულია, რადგან ზემოხსენებული გზით გადაცემული სიგნალი მცირე ჩარევის შემთხვევაშიც კი იცვლება, რასაც ფიზიკაში დამკვირვებლის ეფექტი ეწოდება.

მკვლევრებს მათ მიერ ჩატარებული ექსპერიმენტის შედეგები მნიშვნელოვან წინ გადადგმულ ნაბიჯად მიაჩნიათ და იმედოვნებენ, რომ ეს კვანტური ინტერნეტის შექმნას დააჩქარებს. ისინი უახლოეს მომავალში აღნიშნული ქსელის გაუმჯობესებას და ლაბორატორიის გარეთ გამოცდას, ასევე, მის დღესდღეობით არსებულ საკომუნიკაციო ინფრასტრუქტურასთან ინტეგრირებას გეგმავენ.

კომენტარები

კომენტარეები ვერ მოიძებნა

მიმიხილვის დაწერა